كلها أيام قليله وهنستقبل شم النسيم والربيع ، وطبعا دا اليوم العالمي عند المصريين لضرب رنجه وفسيخ وملوحه كتير وأكيد طبعا لازم بيبسي وفطير علشان الوجبه التمام تتقفل قفله صح ! .
طيب أنت كرياضي ماشي بنظام غذئي معين وتمارين لازم تعملها في ميعاده وجيم كل يوم بتروحه ، يعني من الأخر معظم حياتك علشان الفورمه وتحافظ علي جسمك وفي بالك أكيد هتقول " لا لا مش هأكل ملوحه في شم النسيم وأدمر كل اللي بنيته دا " ، بس أحنا في Champions Eg بنقولك أنت فاهم غلط خالص وهيفوتك كتير لو مستمتعش بالفسيخ والرنجه والبصل يوم شم النسيم وضربت بعدهم بيبيسي دايت وفطيره صغيره كدا . وهنثبتلك في المقاله دي أنك تقدر تتضرب بس كميات مناسبة ومش هيحصل للفورمه أو الدايت اللي بتعمله أي حاجه وكمان هنعرفك عن القيمه الغذائيه الموجوده في كل منتج من منتجات شم النسيم والكميه المناسبة ليك .
منتجات شم النسيم والقيمه الغذائيه لكل منتج منهم : ( الفسيخ ، الرنجه ، البصل الأخضر ، العيش البلدي ، بيبيسي دايت أو كولا زيرو ) . أما بالنسبه للقيمة الغذائيه فهي علي النحو الأتي :
1_ القيمه الغذائية للفسيخ : طبعا الفسيخ هو أهم وجبه عندنا كلنا في اليوم دا ، وعلشان تأكل منه وتستمع لازم تأكل كمية معينه وهي " 100 جرام " فقط ، واللي بتحتوي علي :
" 23 جرام بروتين " .
" 37% فيتامين ب 3 " دا بيمثل تلت أحتياجك اليومي لفيتامين ب 3 في الجسم .
" 140 سعر حراري " .
" 35 % فيتامين ب 6 " ودا بالتاكيد بيمثل تلت أحتياجك لفيتامين ب 6 في اليوم الواحد .
واخيرا 79% من السيلينيوم ، واللي بيمثل تلت ارباع أحتياجك اليومي .
2_ القيمه الغذائيه للرنجة : طبعا الرنجه ليها مكانه خاصة في قلب كل واحد فينا ولازم في اليوم دا نضرب منها حتي ولو حته صغيره ، فأحنا هنعرفك بالكميه المناسبة المسموح ليك تأكلها وهتفيدك جدا وهي علي سبيل المثال 100 جرام " والقيمه الغذائيه دي بتحتوي علي :
24,6 مقدار من البروتين .
217 سعر حراري ودا رقم مفيد جدا لصحتك في اليوم دا .
799% فيتامين ب 12 ، ودا رقم بالتأكيد يخض أي حد حيث أنه بيمثل 8 أضعاف أحتياجك من فيتامين ب 12 في اليوم الواحد ولكن بالتأكيد فيتامين ب12 مش هيضر جسمك ولا تمارينك في حاجه ، بس بقدر الأمكان مش هتزود عن 100 جرام رنجه فقط .
166 أوميجا 3 ودا بيمثل مرة ونصف في اليوم الواحد من أحتياجك لأوميجا 3 .
96 % سيلينيوم ودا بيمثل أحتياجك اليومي من السيلينيوم .
0% كارب ، حيث أنها هي والفسيخ مش بيحتوي علي اي كارب تماما .
3_ القيمة الغذائيه للعيش البلدي : الأكله المتينه دي مش هتكمل من غير العيش البلدي اللي كله بالتأكيد ردة ، بس لو أكلت منه كميه محددة مش هتاثر تماما عليك وهي علي سبيل المثال " 100 جرام " وبتحتوي علي قيمة غذائيه :
275 سعر حراري .
9 جرام بروتين .
33% حديد ودا رقم مناسب جدا لصحتك من العيش البلدي .
50% فيتامين ب1 ، ودا بالتأكيد نص احتياجك اليومي من فيتامين ب1 .
49% من السيلنيوم ودا ما يقارب نص أحتياجك اليومي من العيش البلدي .
أذن تقدر تقول فالعيش البلدي هيفيد جسمك جدا في اليوم وهيديك نص الفيتامينات اللي بيحتاجها الجسم في اليوم الواحد .
4_ البصل الأخضر : هو ينفع تتضرب فسيخ ورنجه وميكونش جمبهم شويه بصل أخضر كدا ، أكيد مينفعش وعلشان أحنا مش عاوزين نحرمك منه هنقولك علي قيمته الغذائيه ليك في اليوم دا وهي :
32 سعر حراري لكل 100 جرام بصل .
1,8 بروتين لكل ايضا 100 جرام منه .
177% فيتامين ك ودا قيمه كويسه جدا لأنه بيمثل مره ونص من أحتياجك من فيتامين ك في اليوم .
33% فيتامين a ودا بيمثل تلت أحتياجك اليومي .
وأخيرا بيديك 21% من السيلنيوم .
وفي نهايه اليوم دا لازم تشرب ماية كتير جداا وليكن أكتر من 3 لتر ماية علشان كل الأملاح اللي أكتسبتها من الأكلات دي تنزل من جسمك ولازم تعرف كويس جدا أن الأكلات دي لازم تكون بحساب وبوزن معين يعني متزدش عن 100 جرام لكل واحده فيهم ، وخليك متأكد أنك لو أكلتهم بحساب هتستمتع والدايت مش هيحصله حاجه وكل تعب الشهور اللي أنت فيه مش هيروح علي الأرض ، فأضرب في شم النسيم وأنبسط بس بحساب يا بطل .
المصدر : كابتن أحمد عادل .