يعنى إيه لاعب فيزيك ؟ إيه الفرق بينه وبين لاعب كمال الأجسام ؟
فى المقال اللى فات إتكلمنا عن رياضة كمال الأجسام وأهميتها وإزاى تكون بطل فيها وتكسب بطولات محلية وعالمية لكن فى مقال النهاردة هنتكلم عن لاعب الفيزيك خصوصا ان فيه ناس مش بتعرف تفرق بينه وبين لاعب كمال الأجسام .
لما تشوف شخص بيتمرن سنين فى الجيم بس معندهوش عضلات ضخمة بس فى نفس الوقت عنده قدرة بدنية رهيبة فدا لاعب فيزيك(فتنس) لكن لما تشوف معاه لاعب عنده عضلات ضخمة وقوية وبارزة وبيتمرن بأوزان مختلفة فأنت قدام لاعب كمال أجسام
يعنى إيه لاعب فيزيك؟
شخص عايز يبقى عنده لياقة بدنية وصحية عالية ودا عن طريق تمارين معينة ونظام غذائى معين ونتيجة كل دا بيكون عنده عضلات قوية بس مش فى نفس ضخامة عضلات لاعب كمال الأجسام اللى بناء عضلات قوية هدفه الأول.
طب إيه الفرق بين لاعب الفيزيك ولاعب كمال الأجسام ؟
فيه فروق كتير جدا وإختلافات بين لاعب كمال الأجسام ولاعب الفيزيك:-
العضلات بتكون أضخم وأبرز عند لاعب كمال الأجسام علشان دى رياضة هدفها بناء عضلات وجسم رياضى عكس لاعب الفيزيك اللى عضلاته بتكون أقل وجسمه منحوت جدا زى الموديل وماينفعش تكون عضلاته زى عضلات كمال الأجسام .
مافيش لاعب كمال أجسام مبياخدش مكملات غذائية أو منشطات هى فعلا بتكون تحت إستشارة طبيب بس بياخد عكس لاعب الفيزيك اللى مش بيحتاج أى نوع من أنواع المنشطات الغذائية .
برنامج التمارين بيكون طويل جدا عند لاعب كمال الأجسام علشان بياخد وقت طويل علشان يبنى عضلة قوية وبارزة عكس برضه لاعب الفيزيك اللى بياخد وقت أقل فى بناء العضلة .
طب نقاط التشابه بين لاعب الفيزيك ولاعب كمال الأجسام :-
نظامهم الغذائى واحد بيحتوى على بروتينات كتير بتساعد فى بناء عضلة قوية وكمان هدفهم واحد اللى هو حرق دهون وتنشيف جسمهم من أى دهون زيادة وبرضه بيستخدموا نفس نوع المكملات الغذائية أو المنشطات.
إيه هى أوضاع الفيزيك على المسرح؟
أوضاع الفيزيك 4 وضعيات:-
الوضع الأول لازم تكون يدك على وسطك يعنى 4 أصابع بالظبط على الشورت وطبعا تبين نقاط قوتك مع كاريزما .
الوضع التانى وضعية الضهر يعنى البطل بيدى ضهره للحكام .
الوضع التالت بتدى كتفك اليمين للحكام وتكون مشدود على الأخر .
الوضع الرابع بتدى وشك للحكام مع فرض جسمك وعضلات وإبتسامة قوية .
تقييم المتسابقين بيتم على أساس مظهر اللاعب وجاذبيته وحضوره على المسرح وكمان الثقة بالنفس علشان هدف لجنة التحكيم إنها تشوف لاعب فيتنس ذو جسم مثالى رشيق وكمان طول .