خلاص أنا قررت أبني عضلات وأروح الجيم وأواظب بقي وأبقي للاعب كمال أجسام قد الدنيا ؟؟
دي الجمله اللي دايما بتقولها لنفسك لو بتحاول تبني عضلات وتبدأ الطريق ، واكيد بتحط أهداف معينه قدامك وهي مواظبه علي التمارين واكل بروتين يوميا عشان تبني العضله ، وكتير منكم عنده معلومه خطأ " أنه كل ما ياكل بروتين اكتر .. كل ما العضله هتتبني اسرع " بس دي طبعا معلومه غلط تماما ، واللي انت متعرفوش أن البروتين له اضرار كتيره جداا وممكن يسبللك مشاكل صحيه كتيرة .
عشان كدا هنعرفك دلوقتي الكميه المسموح ليك تناولها يوميا من البروتين وإية أضرار تناول كميات كبيره من البروتين علي صحتك ، وإية هو البروتين الصناعي ؟ .
1_ الكميه المسموح ليك تناولها : بما أنك بتنزل الجيم كل يوم ومتابع التمارين مظبوط فلازم يكون في نظامك الغذائي بروتين ، ودا بيكون حوالي 100 جرام ، بس طبعا الكميه دي مش قرأن فممكن تتغير من شخص للتاني حسب المجهود البدني والعضلي اللي بيبذله في الجيم ، وخليك عارف كويس أنك لو خلصت تمارينك ومأكلتش الكميه المحدده ليك من البروتين فأنت تعتبر معملتش اي حاجه إطلاقا والتمرين هيروح علي الأرض وبالعكس ممكن كمان يجيب معاك نتيجه سلبيه والعضلات تتدمر ويحصلك شد عضلي وتهلك في الاربطه ، فحدد مع الكوتش بتاعتك كميه البروتين اللي مسموح ليك تناولها يوميا وامشي عليها مظبوط ..
2_ أضرار تناول كميات كبيره من البروتين : البروتين طبعا له فوايد كتيرة وهي بناء العضلات وتقوية الجسم بس بردو لو أكلته بكميات كبيره جدا هيكون له أضرار أكتر وهما علي سبيل المثال :
_ فقدان الشعر ، ودي بنسبه كبيره بتحصل وبتشوفها قدامك أن شخص سليم جدا وقوي شعره بيتساقط بشكل مبالغ فيه ودا بيرجع بسب أنه بيتناول كميات كبيره من البروتين .
_ الغثيان لمرات كتيره في اليوم الواحد .
_ الإرهاق الشديد والشعور بالتعب أغلب الوقت .
_ الإسهال .
_ التعرض لأمراض صعبه مثل القلب والكلي .
ودي أضرار البروتين الطبيعي اللي بتاخده من وجباتك اليوميه ، أما بالنسبه للبروتين الصناعي اللي بتلجأله علشان تزود من بناء العضلات وقوتك في اسرع وقت، فدا له أضرار اكبر بكتير وبشكل كبير الاضرار الناتجه عنه ملهاش اي علاج ومن أبرز أضراره " حصي الكلي " واللي بتسبب فشل كلوي وبتدمر الكليه تماما .. عشان كدا بلاش تلجأ للبروتين الصناعي وخليك في الطبيعي بس بنسب معقوله وهتوصل للحجم العضلي اللي عاوزه وتبني عضلات صح ..