كل يوم بنقرب أكتر وأكتر من رمضان ، وطبعا أنت كلاعب أجسام بتكون خايف جدا ومقلق أن العضلات اللي قعدت تبني فيها شهور وشهور تتدمر والكتله العضليه تنزل وتتضعف ، عشان كدا احنا في Champions Eg بنطمنك وبنأكدلك أنك تقدر تحافظ علي العضلات لو أتبعت أنواع الأطعمه اللي هنعرضها عليك كمان شويه ، الي جانب اننا هنوفرلك في المقال الجاي " أفضل وقت تتدرب فيه " وبالتالي هتقدر تحافظ علي جسمك صح وبإذن الله العضلات مش هينقص من كتلتها شئ ..
1_ التمر باللبن : سيدنا محمد صلي الله عليه وسلم كان دايما وقت الصيام بيفطر علي كوبايه تمر باللبن وبعده بيصلي المغرب ويرجع يبدأ فطاره ، وبالتأكيد سيدنا محمد أتبع العاده دي عشان مفيده جدا لجسمنا وليها فوايد لا تحصي ، وبالنسبه ليك أنت كلاعب كمال أجسام هتساعد علي فتح شهيتك وبعد ما تصلي وترجع هتقدر تاكل الكميه اللي محددها لنفسك وهتغذي جسمك كويس ، أما لو أكلت بعد الأذان علي طول معدتك هتتقفل بسرعه ومش هتاخد كفايتك من الأكل ، ويفضل أن اللبن يكون خالي الدسم علشان جسمك ميكسبش كميه كبيره من الدهون بسبب اللبن كامل الدسم .
2_ الشوربه : بعد ما تخلص الصلاه ، يفضل أنك تبدأ فطارك بالشوربه أي كانت هي إية ، والشوربه مفيده جدا لأنها بتفتح النفس والمعده علي الأكل وبتخليها تستقبل أكبر كميه ممكنه من الأكل . ويفضل بالتأكيد أنك تبعد عن الشوربه الدسمه لأنها بتزود الدهون .
3_ الوجبه الرئيسيه : دي اهم وجبه طبعا ولازم تكون صحيه ومش دسمه ، وبتكون عباره عن بروتين ( لحمه بدون دهون _ فراخ _ سمك _ 5 بيضات ) ويفضل اللحمه وجمبها خضروات ونشويات ، ولازم تكون محدد الكميه اللي هتأكلها علشان متزدش في الدهون .
4_ الخضروات والفواكه : دول بعد البروتين بيعدوا من أفضل الحاجات اللي بتقوي جسمك وتنشطه وتفيد في بناء العضلات ، فلازم كل شويه تأكل خضروات وفواكه بجميع الانواع اللي تلاقيها قدامك ، ومن أفضل أنواع الفاكهه " الموز " لأنه هيمد جسمك بالطاقه وهيقلل الشعور بالعطش ودا بيرجع بسبب أنه غني بالباتسيوم . فلازم تكتر من الموز في رمضان وغيره من الفاكهه زي البطيخ والخوج .
5_ قبل الذهاب للتروايح : قبل ما تروح تصلي التروايح لازم تأكل " بطاطا مسلوقه " و " سكوب واي بروتين " وطبعا جمبهم الفاكهه والخضار اللي كلمناك عنه فوق وتصلي التروايح وتروح تبدأ تمارينك .
6_ بعد التمرين مباشره : أول ما تخلص التمرين تروح علي البيت وتاكل ( سكوب واي بروتين _ علبه تونا متصفيه من الزيت أو صدر فراخ وجمبها طبق سلطه وتنهي الاكله دي بكوبايه لبن خاليه الدسم أو قليله الدسم ) ..
7_ بعد تمارينك بساعتين : بعد ما تخلص الوجبه اللي بعد التمرين مباشره ، حاول متأكلش اي حاجه وتحسب لنفسك ساعتين وبعدهم تأكل " صدر دجاجه كامله مع طبق سلطه " .
8 _ وجبه السحور : كدا أنت بعد الفطار أكلت 3 مرات وكلهم مفيدين جدا وهيقوا عندك العضلات ، دلوقتي بقي اهم وجبه واللي بتنهي بيها يومك وهي وجبه السحور ومكونه من ( علبه تونه و جبنه منزوعه الدسم ودا بيرجع بسب أنها بتحتوي علي كاسين بروتين وبالتالي مفيد جدا لعضلاتك ، وكوب حليب خالي الدسم وجمبه موزه وتفاحه ) .. ولازم تحاول علي قد ما تقدر تاخر سحورك علشان تحس بالشبع طول اليوم وأشرب كميه مايه كبيره .
وأخيرا لازم تبتعد تماما في رمضان عن المواد الغازيه والشاي والقهوه والنسكافيه لأنهم بيزودا عندك نسبه البول وبالتالي هتقفد جزء كبير من المايه في جسمك ، وأكيد لازم تبتعد عن السكريات وحلويات رمضان أو تاخد قطعة صغيره جداا كل يومين من حاجه منهم بس الأفضل تبتعد تماما عن الحلويات وتبدلها بالفاكهه .. ورمضان كريم يا بطل .